貓仔減肥記の負資產月光族貓仔食譜(一)
雞胸肉豆腐飯
終於有機會同大家分享呢個食譜♡
香港乜都貴,出街食個中午飯,快餐都要$40,如果想好些,咁就多謝$50或以上,就快連講廣東話都好可貴(>_<)
咁點樣可以平食呢?
而貓仔亦因為減肥關係,煮左幾個月菜心煮豆腐,唔想餐餐食菜心煮豆腐,咁可以點?
咁就要用下個腦喇,小時候,貓仔媽咪會電飯煲煮田雞飯,臘味飯。最近,肥媽亦教人用電飯煲煮唔同的菜式,雖然貓仔一集都未得閒睇過,但諗起都流口水,因為肥媽都係識煮識食之人嘛,有機會一定要搵返出來睇。
講返細個的時候,媽咪點樣用有限的金錢,煮出唔同的菜式,仲可以餐餐唔同,只係識食的貓仔當然未學到個中的精髓啦,但爛船有三斤釘,仲識分咩叫好味同唔好味,就自創了這款雞胸肉豆腐飯喇(>﹏<)
材料好容易買到,只有超級市場或街市走一轉就得喇( ´▽` )ノ
一人份量的材料︰
雞胸肉1條,又稱雞柳
豆腐1磚,不過貓仔為左無咁快變壞,所以用放在冰箱雪了一日一夜以上,不過,要預先切成一小粒,因為一小粒都要用一小時來解凍,做出來的效果有啲似蜂巢豆腐♡
米半杯,一碗飯的份量,任何米都可以
調味:
豉油,適量,建議1茶匙左右
步驟1
預早一小時將肉及豆腐解凍
步驟2
將米洗好,跟平時的水一樣多就可以。
步驟3
將豉油加入飯,想要有媽媽的味道,就要用屋企食開的豉油喇♡
步驟4
將豆腐及雞胸肉擺靚靚,平均地放在米的上面,蓋好,煮好時會跳制,但要記得等一等,焗5-10分鐘左右,讓水蒸氣蒸發左,尐飯就無咁濕
飯煮熟時,就食得㗎喇,大功告成♡
希望有機會再分享其他菜式啦♡
留言列表